Il chor mischedau Vignogn ei vegnius fundaus da signur scolast Gieri Foppa, e quei igl onn 1927.Quel secumponeva ord la giuventetgna e cantava sper il chor viril mo sporadicamein da fiastas el vitg. Tratgs a strada ei quei chor vegnius cugl intent d’embelir las fiastas religiusas, da cultivar la canzun romontscha e per porscher zatgei alla giuventetgna da nies vitg. Il chor mischedau da Vignogn ei staus in dils emprems en nossa Val Lumnezia.
El ei schizun separtizipaus a duas fiastas da cant dil district (1930 e 1933) ed ad ina fiasta ceciliana (1934).
Suenter 1937 ha il Chor mischedau cantau mo sporadicamein, per exempel 1948 a caschun dalla messa nuviala da Sur Robert Derungs. Ussa era il chor buca mo chor da giuventetgna, era ils maridai astgavan far part da quei chor.
Igl onn 1968 ha il Chor mischedau da Vignogn cantau dalla fiasta giubilara da 100 onns Chor viril Glion cun 35 commembers.
1969 a caschun dalla fiasta da musica Sursilvana ch’ei stada cheu a Vignogn ha nies Chor mischedau cantau culs chors da Vella e Degen ensemen.
Igl onn 1970 ha il chor priu part alla fiasta da cant districtuala a Surrein.
Naven digl onn 1971 – 1981 ha ei dau negin Chor mischedau cheu a Vignogn.
Ils 13 da december 1981 ei stau la radunonza da fundaziun dil chor mischedau Vignogn sco el exista oz. Lu dumbrava il chor 37 commembras e commembers.
Naven da 1981 conta il chor oravontut las fiastas eclesiasticas en baselgia, mo naturalmein era profan dad autras occasiuns sco da sera famigliara, inauguraziuns etc.
Entochen ussa ha il chor mischedau dau treis gadas concert. Denton adina cun in auter chor ensemen.
1982 | Concert d’Advent cul chor mischedau da Siat |
1995 | Concert cul chor viril da Lumbrein e l’uniun da harmonicas Cadi |
1998 | Concert prmavaun cul chor viril da Sagogn |
Era ha il chor priu part ad entginas fiastas da cant cun bien success:
1987 | Fiasta da cant ceciliana a Ruschein |
1988 | Fiasta da cant dirstrictuala a Breil |
1991 | Fiasta da cant ceciliana a Lumbrein |
1993 | Fiasta cantunala da cant a Flem |
1994 | Fiasta da cant districtuala a Sagogn |
1996 | Fiasta da cant ceciliana a Rueun |
1998 | Fiasta da cant distirctuala a Vella |
2005 | Fiasta da cant ceciliana a Falera |
Il pli principal en in chor ei il dirigent. Naven digl onn 1981 entochen oz ha il chor mischedau astgau cantar sut la direcziun da suandonts dirigents:
1981 – 1982 Giusep Giuanin Decurtins
1982 – 1986 Lucas Caduff
1986 – 1990 Pieder Solèr
1990 – 2000 Duri Pelican
2000 – 2002 vacant
2002 – 2005 Daniel Casanova
2005 - 2008 Dagmar Flepp e Willi Derungs
naven digl onn 2008 Dagmar Flepp
La situaziun dil chor mischedau en quels 28 onns d’existenza ei meinsvart stada prechera. Denton han ins adina anflau ina schligiaziun per far vinavon.
Era cantaduras e cantadurs han ins gronda miseria d’anflar. Oz dumbra il chor mischedau 20 cantaduras e cantadurs.
Il cant fa buna luna e legra il cor da mintgin. Perquei stuein nus far quitau da nossa ierta culturala e sespruar da mantener ella aschi ditg sco pusseivel.
Suprastonza:
Serafin Derungs, president
Helena Casanova, actuara
Albin Derungs, cassier
Dirigenta:
Dagmar Flepp
