L’erecziun d’ina nova senda da spassegiar e velo tras plauncas e pradas cultivadas silla vart seniastra dalla val duei esser in tierm ulteriur d’in turissem che s’orientescha alla qualitad. Sc’ina corda digl umblitg colligia quella bellezia senda da panorama ils vitgs cul lag ed il liug da recreaziun Davos Munts. Tgi ch’enconuscha la senda ed appreziescha sias purschidas, anfla adina puspei la via anavos per ina spassegiada ni in trenament. Da quella via meinan cruschadas veglias ella regiun dallas alps. Biars dils noss perdavonts han, enten far diever da quellas vias graschlas, purtau fein, lenna da brisch e products agriculturs el vitg. Culs patratgs ein ins en temps daditg vargai. Tgi che ha buc la savida necessaria, sa far diever dallas tablas d’informaziun agl ur dalla via. Plinavon gida il guid da cultura “Val Lumnezia und Vals”, ad acquistar quella savida.
La reit da viagiar dalla Lumnezia ch’ei vasta vegn mantenida dapi decennis dad uffecis voluntaris e locals. Las sendas da spassegiar meinan pil pli lontan da vias da traffic sur praus e tras uauls. Ils hosps san era far diever duront igl unviern da numerusas rutas. Ellas vegnan successivamein preparadas da maschinas da pista cura ch’ei ha bischau. La carta da viagiar dalla Val Lumnezia ed il prospect da loipas e sendas da viagiar d’unviern dattan ina buna survesta. Ins sa retrer quels mieds gidonters al biro da traffic. Sco puncts da partenza valan ils vitgs dalla Lumnezia, ch’ein tuts colligiai cul traffic public.
