Fusiuns da vischnauncas ein el trend. Denton duei buca vegnir fusiunau suletamein ord quei motiv. Fusiuns duein esser il resultat da decisiuns politicas che vegnan pridas sin fundament d’in bien concept che possibilitescha a nossas vischnauncas muntagnardas da sesviluppar egl avegnir. En Lumnezia ei l’unda da fusiun semessa gia baul en moviment. Igl onn 2002 han las vischnauncas da Camuns, Surcasti, Ternaus ed Uors fusiunau cul num communabel Suraua. Ed en cuort va ei per fusiunar 8 vischnauncas romontschas dalla Lumnezia.
Dapi prest treis onns ei l’organisaziun dil project Futur Val Lumnezia alla lavur. Ils 25 da mars 2011 han las otg vischnauncas decidiu sin fundament dil rapport intermediar cun ina gronda maioritad da cuntinuar cul project. Suenter quellas votaziuns ei l’organisaziun dil project vegnida adattada e gruppas da lavur ein s’occupadas cun ils giavischs inoltrai dallas suprastonzas communalas e da singulas convischinas e singuls convischins. En pliras sesidas ha la cumissiun da project priu posizun viers las propostas elaboradas dallas gruppas da lavur e decidiu en caussa. Quellas posiziuns e decisiuns ein vegnidas integradas el rapport final. Dapi il settember 2011 ei era il conclus dalla Regenza avon maun. Quei conclus garantescha el cass d’ina fusiun considerablas contribuziuns sco era autras mesiras da promoziun.
Il rapport final vegn presentaus a convischinas e convischins a caschun d’occurrenzas d’informaziun en mintga singula vischnaunca. Nus havessen plascher, sche biars prendessen era questa gada part a quellas occurrenzas. Aschia duesses Vus haver obteniu las informaziuns necessarias per saver prender ina decisiun objectiva e bein ponderada. Ina fusiun ei da grond’impurtonza pil futur da nossa vallada e dess a quella nova forza e novas perspectivas.
