Far enconuschientschas cun tiaras e culturas jastras ei in basegns elementar dil carstgaun. Buc il davos gidan las medias a sensibilisar pigl auter, pigl jester. Viadis da recreaziun e scolaziun ein savens ils premis principals dad ina concurrenza. Il temps da vacanzas ei gia dapi onns buc sulettamein in temps da sport, recreaziun e divertiment. Il temps da vacanzas ei daventaus in temps d’aventura. Cun vacanzas en autras tiaras e regiuns han ins savens igl intent da recaltgar novas impressiuns, engrondir il horizont e la savida en connex cun cultura e scolaziun.
La Val Lumnezia ha en quei connex ina purschida multifara ed interessanta. Ins sa perscrutar ella a moda e maniera sportiva, culturala, historica e botanica. Ins sa studegiar stils da baghegiar vegls e moderns, sescaldar per legendas e mitus, reiver siper cuolms silenzius, far part ad in’excursiun geologica u bein culturhistorica ni degustar buontads culinaricas en restaurants famigliars. Silsuenter anflan ins caussas interessantas ed informaziuns generalas davart la Val Lumnezia.
